USA Gam Sung aa Om Zomi U leh Nau Khempeuh,
Ih pianna Zogam leh kawlgam aa ih neih ngeiloh USA gam ihtun ciang aa ih ngah hamphatna tampi te sungpan in a thupi mahmah khat in Life Insurance lei theih/neih theih na a hihi. US gam katun zawh kum 21 pha ta aa, ka tuntung lam in Life Insurance cih bang a thu in kazak hang ka tam ngaihsut kha ngei kei hi.
A beisa kum 10 lai aa kipan, deihloh pen sihna manna tuak leng, ka zi ka tate mailam nuntak ziading ka ngaihsun kha aa, Life Insurance a neih huai lam ka telciang ka lei pah hi. Ka khangno lai zawk deuh in LIfe Insurance kana leikhak pen ka lungdam kik mahmah hi.
USA gamsung ah Zomi 6000 (tul guk) bang om tading in ka lamen hi. A beisa kum khat sung bekbek in, Zomi te sungah khangham te bek hilo in, khangno tangval te zong 3 leh 4 in hong sihsan ta hi. Zomi sungah a si ih omciang, ih kivui nading (han khuk leh hankuang lei nading) ih lung himawh masa pen uh hi. Ih luang hawm ih phum khit ciang, a damlai ih zi ihta te bangci nuntak ding cih ih tam ngaihsut lua nai kei hi. A hangpen sih sawm nai hetlo tek ih hih man hi.
Nung nipi sung in, Tulsa khua aa (71st street) aa QT datsi sai mai ah, nitak nai 8 pawl in minih thau tawh kikaplum cih TV ah hongsuak hi. Tua mun pen Zomi khangno pawlkhat in BEER (zu) lei aa apai mun mahmah na a hih lam thei ka hih man in, deih loh pen thau tawh a kikap lum mi nih te ei mi ahi khatammaw cih pen Zomi makai te leh nu leh pa te lung hihmawh masak pen hong hi hi. Ka lungsim sungah, deihloh pen in, Zomi bang na hikha mawk henla, zi leh ta nei khat bang hi kha leh, azi a ta te a bang ci nuntak tam? cih ka ngaihsun kha hi. Tangval khat peuh hileh zong, a pian na a nu a pa ten a luang hawm a muh loh ding ban ah, kawlgam aa a nu a pa a gal vak, USA aa sum thalawh pen in sihsan mawk leh, nu leh pa te a bangcih nuntak tam cih ka lungngai kha hi.
Life Insurance tawh kisai theih huai thu a tomno in:
1). Life Insurance nampi nih om aa, Term Life Insurance (a hun ciangtan Life Insurance) leh Whole Life Insurance (khantawn a huam Life Insurance) om hi. Whole Life Insurance pen khasim aa ih paikding tam mahmah aa, Term Life Insurance aa ding khasim aa piak pen tawm zaw thamtham hi. USA gambup aa seminar a nei den (tentan pia aa minthang mahmah), mipil minthang mahmah Financial Peace University nei pa, David Ramsey bang in Term Life Insurance lak zawk ding nasia tak in hanthawn den hi.
2). Term Life Insurance aa ding kum 10 sung, kum 20 sung, kum 30 sung cihbang in kilei thei aa, tua bang aa a kum ciangtan sa aa na lei leh tua kum sungteng, khasim aa na piak pen khangthei nonlo in kibang den dinghi. Na khangno lai in lei le cin, khasim aa piak kul pen tawm zaw tham aa, kumtam khit ciang lei pan leng khasim aa piak ding pen tam zaw tham hi. Na sih leh na nu na pa, na zi na te te ngah ding, $50,000, $100,000, pan a tungsiah zong tampi kilei thei lai hi.
3). Bang hang bang hang tawh na si zongin, na sih nak leh na ngahding hamphat na na lei kholh zahzah, a ngahding aa na min piak nu/pa in ngah ding hi. Hamphat na ngah ding mite USA ah om tektek kul tuanlo aa, kawlgam aa om na nu na pa, na u na nau, na zi na ta te te min zong na guang thei hi. Deihloh pen nitak aa lum, zingsang ciang khua phawk lo in nasih leh zong, cover hi.
4). Nungak tangval lai khangno te bang in, sih na khat naneih leh hamphat na ngah ding in inn lam aa om na pianna nu leh pa te min guang le cin, nasih khit ciang, na nu napa ten midang nuntak na eng lo in, na nungta ding uh hi.
5). A deuhdeuh in USA gam aa om zi leh ta nei nasem pasal te bang in lei huai phadiak hi. Deihloh pen, mawtaw accident hiam? dam loh na hang hiam tawh si le hang, ih zi ih ta ten $100,000 maw? $200,000 maw? $300,000 maw na ngah le uh, ih damlai sang na ngawn in sumleh pai lam ah na ki khuasa zo zawlai ding uh hi.
6). A cidam leh a khangno lai te aa ding bang in, khasim aa piak sum pen tam hetlo hi. Ih nek ih dawn theih pawlkhat kidek leng (khiam leng) a ki leizo tek lua ding hi.
7). Accidental death Insurance ci in, accidence tawh ih sih leh bek hong cover nam om aa, khasim sumpiak tawm mahmah aa, accident lo buang a hangdang tawh ihsih leh hong cover lo hi. Tua ciang, Life Insurance cih leh company pan aa na lei Health Insurance (cidamna tawh kisai insurance) zong tel khial kha kei ni.
8). Tu aa nasepna company tungtawn aa Life Insurance leipen khasim aa piak ding a tawm zawkdeuh namun om aa, a tawm zawk tuanlohna mun zong om hi. Pawlkhat pen, company aa nasep sung in khasim sum piak tawm aa, tua company ah sem non kei le cin, a zah tampi in a khang pah zong pawl khat om hi. A kizom suak thei pawlkhat om aa, company khel le cin a ki zomsuak thei nonlo zong om hi. Na zop suak theih leh zong tua te pen, a pualam rate (zi) dan pian hi aa, khasim sum piak tawm zaw tuan lo hi. (Hih te pawl pen Tulsa khuasung aa Zomi 300 val te sepna AAON Company ah khasial in Insurance tawh kisai company ten kamphen in hong cial den uh a hih man in, hon khat ka theih beh hi). A pualam company pawl khat zong kan kawikawi ing. Kei mahmah in zong, Life Insurance ka neih na kum 10 val ta hi.
9). Sih sawm nai hetlo tek hi hang. A hizong in, ih hun ding a thei khol omlo ih hih man in, mihinglam pan, ih zi ih ta, ih nu ih pa, ih u ih nau te khualna tawh, Life Insurance ih leitek nading in Zomi Innkuan USA makai te in mipi te kong hanthawn uh hi.
10). USA gamsung aa om Zomite sungah Life Insurance a nei khin zong pawl khat ki om ta aa, lungdam huai mahmah hi. A nei nailo te aa ding in, mangpau, kawlpau zat kul lo, ih ZOPAU tawh LIfe Insurance lam aa a sem, pa Thomas Tual Kim pen Primerica Insurance Company ah hunbit (ful-time) aa sem hi aa, USA gamsung aa om Zomi khempeuh in ih zat theih ding in, nung July 2-3, 2011 Zomi Innkuan khawmpi, Atlanta khuapi pan in, kipawlna mintawh zatding in khensat na a ki nei a hihi.
Tual Kim pen, Zomi Innkuan USA kipawlna pan aa, USA Zomi te lak aa vak kawikawi aa, LIfe Insurance tawh kisai hong vaihawm pih ding aa a kiseh a hih bang mahin a ma lam pan ginat lohna leh pau ban na hong neih leh, ZIUSA makaipi te tungah hong zasak le uh cin, a kisam bang in, hong ki vanpih ding hi cih zong hong zasak ung.
11). Hi bang aa Pa Tual Kim leh ZIUSA kizopna kagen hang in, a mah bek zat theih ding cih hituanlo aa, Life Insurance lam aa a sem khat pepeuh, Zomi a hi aa, mi namdang a hizong in zat theih a hihi. Tual Kim sepna company Primerica bek hilo in a dangdang company tampi zong om aa tua te zong zat theih hi. A thupi penpen ah, USA gamsung aa om Zomi a kici khempeuh in LIfe Insurance ih neih ciat ding kong hanthawn nuam hi. Na kisik kei ding hi.
Hu thutawh kisai, Zomi Innkuan USA makai pawlkhat leh Pa Tual Kim te holimna Youtube pan na et nai kei leh, hih a nuai aa pen na mek le cin na en theiding hi. Dot behnop leh kan beh nopna ah om leh, Pa Tual Kim nana contact in. A mah pen (Tel: 301-524-4476) or e-mail: tualzokim@yahoo.com ah na contact thei hi.
http://www.youtube.com/watch?v=5a0BiOiMdq4&feature=channel_video_title
Veina leh deihsakna lianpi tawh Zomi Innkuan USA Executive Committee tangin,
Dr. Chin Do Kham
Vice President/ Secretary of Public Relations Committee
Zomi Innkuan USA
Simsuak nuam lai leh...
Lungdam ei atopdong na sim...
